Sunday, June 26, 2011

دليلك السريع للتحقيق بالكازينو

ولفهم الية عمل الحكومات الاردنية

أولاً: المجلس الوطني للسياحة
وزير السياحة عمل كتاب من مكتبه مباشرة معلماً رئيس الوزراء بأن المجلس الوطني للسياحة قرر إعتبار نشاط الكازينو من المهن السياحية المعتمدة بقانون السياحة.
ارسل وزير السياحة اسامة الدباس هشام العبادي مدير مكتبه يلف على أعضاء المجلس (معظمهم أمناء عامين وزارات وما شابه) عشان يوقعوا على الكتاب، بس مع طلب من الوزير إنه هشام يحلق لأمين عام الأوقاف تجنباً للإحراج
انقسمت ردود فعل أعضاء المجلس كالآتي:
-مجموعة وقعت ولا كأنه في حاجة عادي جداً
-مجموعة ولا سمعت بالقرار وما أجاش عليهم هشام
-واحد رفض (أمين عام البيئة) بعدين شافه وزير الشؤؤن القانونية صدفة وقال وقع احسنلك راح وقع وشاف الدباس صدفة راح الدباس قله شكراً
-رياض الخشمان رفض وسلخهم آية قرأنية وروح من المجلس بعد شهرين (ابصر ليش)، مها الخطيب رفضت خاصةً إنه جابولها القرار توقعه في الدار، ومعن النسور رفض ورفض نصيحة هشام بالإتصال مع وزير السياحة ممكن يغيير رأيه.
طبعاً أضف إلى ذلك أن هناك إحتمال إنه في تزوير بتاريخ الكتاب، بس كله فرق يوم مش قصة.

ثانياً: فض العروض
جاء للوزارة ثلاث عروض من نفس الشخص (شركة إله لسا مش مسجلة، وشركة إله ولإبن عمه، والشركة الثالثة هي المشغل إللي جايبينه معهم، إلي هاي الشركة إلي كانت مشغلة كازينو أريحا)
راح الدباس عمل لجنة مشكلة منه ومن مدير مكتبه هشام ومن مساعده للشؤون الفنية المهندس المعماري إيهاب عمارين وحط هشام وايهاب بمكتب وقلهم شباب معاكو ساعة تطلعولي بأحسن عرض (مع الأخذ بعين الاعتبار إنه هشام ما بعرف إنجليزي)

ثالثاً: جلسة مجلس الوزارة
كحشو كل الموظفين من الجلسة التي عقدت برأسة خالد الزعبي وزير الشؤون القانونية في ما تبيين بعد انه غير قانوني آنه الرئيس يعيين رئيس غيره.
لما اجا وقت فتح موضوع الكازينو اجى أمين عام المجلس محمد الشريدة وطلب من وزير الأوقاف ييجي على مكتبه ولما رجع كان إلي صار صار، يعني تجنباً للإحراج برضه.
على هامش سريع: محمد الشريدة بحكي إنه سمع عن الكازينو بالصدفة من أحد الوزراء مع إنه سامي داوود موظف ثاني بالرأسة بحكي إنو لما طلبوا من الموظفين مغادرة الجلسة كان الشريدة هو الوحيد الذي على علم بالقرار..والله أعلم مش فارقة)

خالد الزعبي فتح موضوع الكازينو وشرح للشباب في المجلس المصغر (وهناك تسجيل في مجلس الرئاسة يشير إلى أن دولة الرئيس طلب إجتماع لمناقشة الكازينو بغياب وزير العدل (محمد شريف الزعبي المعارض بالكامل للمشروع ) والاوقاف والخارجية (على أساس إنه بحضر)) وشرحلهم إنه الموضوع في مكسب منيح وإنه مدروس بالهبل (بساعة زمان).
ردود فعل الوزراء كانت بأنهم وقعوا ولا كأنه في اشي على تفويض وزير السياحة على توقيع الإتفاقية بدون ما يشوفوها. (راجع أسماء الوزراء البصيمة وين ما بدك). في أكمن وزير ما اجوا على الجلسة ولا سمعوا بالموضوع ولا فرقت معهم يعرفوا شو الموضوع. دونت آسك دونت تل أو احكي انك ما بتعرف إنجليزي، كما سنرى لاحقاً.

رابعاً: حكومة الذهبي
لما استلمت مها الخطيب الوزارة أجى عليها هشام العابر للوزارات وقالها إنو مالك شركة اواسيس حابب يشوفها عشان الإتفاقية. بحبشت مها عن الاتفاقية بالوزارة ما لقتها. حكت مع الدباس قالها دوري منيح. حكت مع الذهبي قالها بتحكي مع الدباس كمان مرة وبتقليله يجيب الاتفاقية وييجي ركاض (أو حسب النص خلال ساعتين).
مسك الذهبي والخطيب وزير العدل أيمن عودة الإتفاقية فخف عقلهم من الشروط الجزائية.
حكى الذهبي مع البخيت قال البخيت أنا ما بعرف وما قريت الاتفاقية (البخيت في مكان آخر بقول إنو هو أصلاً تعذر عليه الاحاطة بكل تفاصيل التفاقية لعدم اتقانه اللغة الانجليزية). حكى مع خالد الزعبي قاله أنا والله ما قريت الاتفاقية كمان (هذا وزير الدولة للشؤون القانونية ها) (الزعبي برضه بكون حاكي إنه هموا بعتولوا الاتفاقية بس (لا يتقن اللغة القانونية المتخصصة بالانجليزية...أستاذ دكتور في القانون العام بالمناسبة). حكى الذهبي مع الدباس وقالوا استشرت حدا في الاتفاقية قالوا الدباس محاسبين ماليين في وزارة السياحة.

خامساً: التسوية
من يوم الذهبي لليوم ولسة القضية عالقة مع المستثمر شوان الملا. الزلمة قلهم أنا ضيف هون وانتوا على راسي والإتفاقية بنمزعها هسا بس عوضوني عن خسائري في السنوات الأربع الماضية. في رواية بتقول إنه طلب سبعة وشوي مليون (رواية سمير الرفاعي)، وهو بقول طلب خمسة مليون، والرفاعي قالوا خذ مليون وأغرش، فما قبل وطلب من محاميه تعليق مفاوضات التسوية حتى اليوم.

احتمال يتبع: بعد الجلسة